Woestynwysheid

In Woestynwysheid neem Ronell Bezuidenhout lesers op ’n reis deur die woestyn, waar die woestynvaders en -moeders, sowel as ander mistici, as gespreksgenote dien. Sy deel insigte wat sy by askete soos Antonius die Grote, Benediktus, Julian van Norwich, Sinkletika en Thomas Merton opgedoen het. Deur hierdie geselskap ondersoek sy die waarde van eenvoud, stilte, afsondering, stroping, en die vind van rus te midde van ’n haastige en besige wêreld. Ronell put uit haar eie ervaring as leraar, pastorale terapeut en retraiteleier, en nooi lesers uit om op ’n diepgaande en uitdagende manier terug te keer na die kern van hul geloof. Die boek bevat haar persoonlike joernaalinskrywings waarin sy haar gedagtes en worsteling deel, sowel as geloofsgewoontes wat op praktiese maniere in die alledaagse lewe toegepas kan word.