God in die gewone

Dit is nie in die asemrowende nie, maar in die gewone wat die wonderwerk van die lewe lê.

Gelowige mense is altyd op soek na die asemrowende. Hulle wil snak na hul asems en iets groter as groot ervaar. Die waarheid en die sin van die lewe moet altyd met trompetgeskal aangekondig word. Dit kan nie net rustig na jou toe aan rimpel en oor jou spoel nie.
Soms is al wat dit verg om God te sien, om stil te staan en te sien hoe daar in jou lewe vir jou gesorg is. Hoe slegte tye oorleefbaar gemaak is en hoe God altyd net daardie misterieuse teenwoordigheid was met wie jy gestry het, wat jy ontken het, maar wat jou nooit verlaat het nie.
God is asemrowend, maar nie omdat Hy in die asemrowende gevind kan word nie. God is asemrowend, omdat as jy jou oë oopmaak, sal jy Hom sien …
daar in die gewone.

Karen Swart skryf oor haar gewaarwordinge van die lewe – van die dinge wat ons nie kan sien – oral te vind in die alledaagse van die lewe.